زەمه‌ن دووپات

ئه‌بێته‌وە!

منداڵه دڵ وەکو جاران

ئاوازی عه‌شق

ئه‌ڵێته‌وە!

خۆشه‌ویستیم که پێموابوو 

تازە ئیدی نایه‌ته‌وە،

وا هه‌ست دەکه‌م سه‌رله‌نوێ

ئه‌ژێته‌وە!

باش له بیرمه، نۆ خووله‌ک و چه‌ند چرکه

لێوم نه‌یویست له لێوانت

جوێ بێته‌وە!

ئێستا به یادی ئه‌و

ماچه،

چاوم به نیگاته‌وە ئاوسه و

هه‌ر چرکه‌یه‌ک ، نۆ خوله‌ک ئه‌شکی ماچی

 ناچارە

لێبێته‌وە!

ئێستاش

ڤاگۆنی شه‌مه‌ندەفه‌رەکه‌‌ی لای ماڵتان

رۆژی سه‌د جار هه‌ڵمدەگرێ و

له سندووقی لای ماچه نهێنییه‌کانی هه‌ردوکمانم

ئه‌نێته‌وە!

دوایین جار که گووتت: ماڵاوا،

هێشتا ناخم هه‌ڵیگرتووە و

دوایین نیگات قه‌ت له چاوم

نابێته‌وە!

دڵم دیسان وەک منداڵێ بیرت دەکا و

وا هه‌ست دەکه‌م

زەمه‌ن دووپات

دەبێته‌وە!